قەندیل پرێس
قەندیل پرێس
ئەمرۆ 18ـی کانوونی دووەمی 2026 ئەحمەد شەرع سەرۆکی کاتی سوریا ومەزڵوم عەبدی فەرماندەی گشتی هێزەکانی سوریای دیمۆکراتیک بە پەیوەندی تیلەفۆنی قسەیان کرد و لەسەر ڕاگرتنی شەڕ و چەندین خاڵی دیکە رێککەوتن.
ئەحمەد شەرع لە کۆنگرەیەکی رۆژنامەوانیدا ڕایگەیاند: بنەمای رێککەوتنمان لەگەڵ مەزڵووم عەبدی ئاگربەستە و دەبێ دامەزراوەکانی دەوڵەت بچنە سەرجەم پارێزگاکانی سووریا.
ئەحمەد شەرع وتیشی: بڕیار بوو لەگەڵ مەزڵووم عەبدی کۆببینەوە، بەڵام بەهۆی خراپیی کەشوهەواوە نەمانتوانی و بە تەلەفۆن قسەمان کرد.
خاڵە سەرەکییەکانی ڕێککەوتنی نێوان حکومەتی سوریا و هێزەکانی سوریای دیموکرات:
یەکەم: ئاگربەستێکی دەستبەجێ و گشتگیر لە هەموو بەرەکانی جەنگ و هێڵەکانی بەریەککەوتن لە نێوان هێزەکانی حکومەتی سوریا و هێزەکانی سوریای دیموکرات (هەسەدە)، لەگەڵ کشانەوەی سەرجەم پێکهاتە سەربازییەکانی هەسەدە بۆ ڕۆژهەڵاتی ڕووباری فورات وەک هەنگاوێکی سەرەتایی بۆ دووبارە بڵاوەپێکردنەوە.
دووەم: ڕادەستکردنی تەواوەتی و دەستبەجێی کارگێڕی و سەربازیی پارێزگاکانی دێرەزوور و ڕەققە بۆ حکومەتی سوریا. ئەمە گواستنەوەی سەرجەم دامەزراوە مەدەنییەکان دەگرێتەوە، لەگەڵ دەرچوونی دەستبەجێی مەرسوومەکان بۆ جێگیرکردنی فەرمانبەرانی ئێستا لە چوارچێوەی وەزارەتە تایبەتمەندەکانی دەوڵەتی سوریا.
سێیەم: یەکخستنی هەموو دامەزراوە مەدەنییەکانی پارێزگای حەسەکە لە ناو دامەزراوەکانی دەوڵەتی سوریا و پێکهاتە کارگێڕییەکانی.
چوارەم: حکومەتی سوریا کۆنترۆڵی هەموو دەروازە سنوورییەکان، کێڵگە نەوتییەکان و کێڵگە گازییەکانی ناوچەکە دەگرێتە دەست، پاراستنیان لەلایەن هێزە فەرمییەکانەوە مسۆگەر دەکرێت بۆ دڵنیابوون لە گەڕانەوەی سەرچاوەکان بۆ دەوڵەتی سوریا، لەگەڵ ڕەچاوکردنی دۆخی تایبەتی ناوچە کوردییەکان.
پێنجەم: یەکخستنی تەواوەتی هەموو کارمەندە سەربازی و ئەمنییەکانی هەسەدە لە ناو پێکهاتەکانی وەزارەتی بەرگری و ناوخۆی سوریا لەسەر بنەمای “تاکەکەسی” دوای ئەنجامدانی پشکنینی ئەمنی پێویست، و پێدانی پلەی سەربازی، شایستە داراییەکان و پێداویستییە لۆجستییەکان بەپێی ئەوە.
شەشەم: سەرکردایەتی هێزەکانی سوریای دیموکرات (هەسەدە) پابەند دەبێت بەوەی پاشماوەکانی ڕژێمی پێشوو نەکاتە ناو ڕیزەکانی خۆی، و لیستێک لەو ئەفسەرانەی پاشماوەی ڕژێمی پێشوون و لە ناوچەکانی باکووری ڕۆژهەڵاتی سوریان، پێشکەش بکات.
حەوتەم: دەرکردنی مەرسوومێکی سەرۆکایەتی بۆ دەستنیشانکردنی پاڵێوراوێک بۆ وەرگرتنی پۆستی پارێزگاری حەسەکە، وەک گەرەنتییەک بۆ بەشداری سیاسی و نوێنەرایەتی خۆجێی.
هەشتەم: لابردنی بوونی چەکی سەربازیی قورس لە شاری عەین ئەلعەرەب (کۆبانێ)، و پێکهێنانی هێزێکی ئەمنی لە دانیشتوانی شارەکە، لەگەڵ هێشتنەوەی هێزێکی پۆلیسی خۆجێی کە لە ڕووی کارگێڕییەوە سەر بە وەزارەتی ناوخۆی سوریا بێت.
نۆیەم: یەکخستنی ئەو کارگێڕییەی بەرپرسە لە مەلەفی زیندانیانی داعش و کەمپەکان، هەروەها ئەو هێزانەی بەرپرسن لە پاراستنی ئەم دامەزراوانە، لەگەڵ حکومەتی سوریا بۆ ئەوەی حکومەت بەرپرسیارێتی تەواوی یاسایی و ئەمنییان بگرێتە ئەستۆ.
دەیەم: پەسەندکردنی لیستێکی پاڵێوراوان کە لەلایەن سەرکردایەتی هەسەدەوە پێشکەش دەکرێت بۆ وەرگرتنی پۆستە باڵاکانی سەربازی، ئەمنی و مەدەنی لە ناو پێکهاتەی ناوەندی دەوڵەتدا بۆ مسۆگەرکردنی شەراکەتی نیشتمانی.
یازدەم: پێشوازیکردن لە مەرسوومی سەرۆکایەتی ژمارە ١٣ی ساڵی ٢٠٢٦، کە دان بە مافە کولتووری و زمانییەکانی کورددا دەنێت و چارەسەری کێشە هەڵپەسێردراوەکانی ماف و مەدەنی دەکات—لەوانە کەسانی بێ ناسنامە (بێ وڵات) و داواکارییەکانی مافی موڵکداری کە لە دەیەکانی ڕابردووەوە کۆبوونەتەوە.
دوازدەم: هەسەدە پابەند دەبێت بە دوورخستنەوەی هەموو سەرکردە و ئەندامە ناسووریەکانی پارتی کرێکارانی کوردستان (PKK) بۆ دەرەوەی سنوورەکانی کۆماری عەرەبی سوریا بۆ مسۆگەرکردنی سەروەری و سەقامگیری ناوچەیی.
سێزدەم: دەوڵەتی سوریا پابەند دەبێت بە بەردەوامبوون لە شەڕی دژی تیرۆر (داعش) وەک ئەندامێکی چالاکی هاوپەیمانی نێودەوڵەتی، بە هەماهەنگی لەگەڵ ویلایەتە یەکگرتووەکانی ئەمریکا، بۆ مسۆگەرکردنی ئاسایش و سەقامگیری ناوچەکە.
چواردەم: کارکردن بۆ گەیشتن بە لێکتێگەیشتن سەبارەت بە گەڕانەوەی سەلامەت و شکۆمەندانەی دانیشتوانی ناوچەکانی عەفرین و شێخ مەقسوود بۆ سەر ماڵ و حاڵی خۆیان.
سەرۆکی کۆماری عەرەبی سوریا: ئەحمەد ئەلشەرع
فەرماندەی هێزەکانی سوریای دیموکرات: مەزڵوم عەبدی
