Qendîlprêss
QSD’ê der barê tevgera hêzên hikumeta veguhêz a Sûriyeyê li derdora bajarokê Dêr Hafir û taxên Şêxmeqsûd û Eşrefiyê de daxuyanî da. Di daxuyaniyê de hat diyarkirin ku eger ev tevger bidomin bersiva wan ê were dayîn.
Ev çend roj e hin komên hêzên hikumeta veguhêz a Sûriyeyê li derdora bajarokê Dêr Hafir hewl didin agirbestê têk bibin, her wiha li derdora taxên Şêxmeqsûd û Eşrefiyê yên Helebê jî di tevgerê de ne û balafirên bêmirov li ser ezmanên herdu taxan digerînin. Têkildarî wê Hêzên Sûriya Demokratîk (QSD) daxuyanî da.
QSD’ê destnîşan kir ku kiryarên wiha peymana di navbera Meclisa Taxên Şêxmeqsûd û Eşrefiyê û hikumeta veguhêz a Sûriyeyê de ya 1’ê Nîsanê têk dibin û ji aliyê şêniyên herdu taxan ve cihê şermezarkirinê ne.
QSD’ê di daxuyaniyê de bang li hikumeta veguhêz a Sûriyeyê kir ku wan koman kontrol bike û pêşî li hewldanên têkbirina peyman û lihevkirinan bigire.
Di daxuyaniyê de hat destnîşankirin ku eger ev tevger bidomin hêzên QSD’ê dê di çarçoveya parastina rewa de bersivê bidin.
