Qendîlprêss
Artêşa Îsraîlê ragihand ku doh bi şev bi 200 balafiran li Îranê xistiye, Îranê jî diyar kir ku bi zêdeyî 100 droneyan bersiv daye. Li gorî agahiyên destpêkê Serokê Fermandariya Giştî mir, 50 kes jî birîndar bûn.
Berdevkê artêşa Îsraîlê ragihand ku 200 balafirên şer ên Îsraîlê tevlî êrîşên doh bi şev ên li ser Îranê bûne. Hate eşkerekirin ku li zêdeyî 100 hedefan hatiye xistin. Êrîş li ser gelek bajar û navendên nukleerê hate kirin.
ÊRÎŞ DEWAM DIKIN
Artêşa Îsraîlê ragihand ku sibeha Înê êrîşên li ser navendên nukleer û leşkerî yên Îranê dewam kirin.
Berdevkê artêşê Tûggeneral Effie Defrin saet di 07:00 de li televîzyonê peyamek weşand û got, “Pîlotên me li herêmên cuda yên Îranê êrîş birin ser hedefên leşkerî û hedefên têkildarî bernameya nukleerî. Êrîş dewam dike.”
HERÎ KÊM 50 BIRÎNDAR
Li gorî televîzyona dewletê ya Îranê, di êrîşa Îsraîlê de jin û zarok jî di nav de herî kêm 50 kes birîndar bûn. Televîzyona dewletê diyar kir ku piştî êrîşê “50 kesên ji ber êrîşa Îsraîlê birîndar bûn rakirin Nexweşxaneya Chamranê (Tehran). Ji wan herî kêm 35 jê jin û zarok in.”
RAYEDARÊN PAYEBILIND ÊN LEŞKERÎ MIRIN
Di êrîşê de gelek payebilindên leşkerî mirin. Televîzyona dewletê diyar kir ku Serokê Fermandariya Giştî ya Îranê General Mûhammed Bagerî hatiye kuştin.
BI ZÊDEYÎ 100 DRONEYAN BERSIV HATE DAYIN
Artêşa Îranê diyar kir ku zêdeyî 100 drone bi hewa xistiye û bersiv dane Îsraîlê. Tê payin ku di nava çend saetan de drone bigihêjin Îsraîlê. Artêşa Îsraîlê ji bo rawestandina van amadekariyan dike.
AGAHÎ JI TRUMP RE HATE DAYIN
Serokê DYE’yê Donald Trump ji Fox Newsê re ragihand ku wî berê zanîbû wê Îsraîl êrîşî Îranê bike û anî ziman ku divê Tehran nebe xwedî çeka nukleerî. Trump got, “Nabe ku Îran bibe xwedî bombeya nukleerê û em hêvî dikin ku li maseya danûstandinan vegere. Em ê bibînin.”
SEROKWEZÎRÊ ÎSRAÎLÊ: WÊ ÊRİŞ BİDOMİN!
Serokwezîrê Îsraîlê Binyamîn Netanyahu derbarê êrişa li ser Îranê de diyarkir ku operasyon, heta ku gef bi temamî ji holê tê rakirin dê bidome.
Artêşa Îsraîlê li dijî Îranê êrişeke berfireh da destpêkirin. Serokwezîrê Îsraîlê Binyamîn Netanyahu têkildarî êrişê vîdeoyek weşand.
Netanyahu, got: “Ji bo jiholêrakirina gefa Îranê ya li dijî hebûna Îsraîlê, me operasyoneke leşkerî da destpêkirin. Ev operasyon, heta ku gef bi temamî ji holê tê rakirin dê bidome.”
