قەندیل پرێس
بەڕێوەبەری روانگەی سووری بۆ مافەکانی مرۆڤ رایگەیاند، تورکیا نایەوێت هاوکاری بگاتە دەستی کوردەکان، ئەردۆغان و دەستەکەى وا بڕیار دەدەن بیانەوێت کۆتایى بە کورد بهێنن.
رامی عەبدولڕەحمان، بەڕێوەبەری روانگەی سووری لەمیانی بەشداریکردنى لە گەشتى هەواڵەکانى کاتژمێر 13ـى کەناڵ8ـدا گوتی، “ئەردۆغان و دەستەکەی وا بڕیار دەدەن بیانەوێت کۆتایی بە کورد بهێنن، هەسەدە تەنیا پاساوێکە بۆ تورکیا”.
گوتیشى، “تورکیا دەیەوێت دەستبەسەر بڕیارى سیاسیی سووریادا بگرێت، وەکو بینیمان هاکان فیدان و ئەردۆغان بڕیاری لەناوبردنى کوردانى رۆژئاوایان لەژێر ناوى هەسەدەدا داوە، لە راستیدا ئامانجى تورکیا هەسەدە نییە بەڵکو ئامانجى کوردە”.
بەڕێوەبەری روانگەی سووری ئاماژەى بەوەشکرد، “تورکیا نایەوێت هاوکاری مرۆیی بگاتە رۆژئاوا و عەفرین، دەیەوێت دۆخى مەدەنییەکان سەختتربێت، دەیەوێت ئەوەى لەوێ بمێنێتەوە لە حاڵەتێکی خراپدا بێت و بیر لە چۆڵکردنی بکاتەوە، ئەوەشی لەوێ ئاوارە بووە نەگەڕێتەوە بۆ عەفرین”.
