قەندیل پرێس
هاوسەرۆکی دەستەی پەیوەندییەکانی دەرەوەی بەڕێوەبەرایەتیی خۆسەر رایگەیاند، ئامادەیی تەواویان بۆ کردنەوەی رێڕەوێکی مرۆیی بەرەو سوەیدا دووپات دەکەنەوە.
ئیلهام ئەحمەد، هاوسەرۆکی دەستەی پەیوەندییەکانی دەرەوەی بەرێوەبەرایەتی خۆسەر لە پۆستێکیدا لە تۆڕى ئێکس دەڵێت، “لە ساڵیادی شۆڕشی 19ـی تەمموزدا بە نیگەرانییەکی قووڵەوە تەماشای ئەو بارودۆخە سەختە مرۆییە دەکەین، کە گەلەکەمان لە شاری سوەیدا لە ئەنجامی گەمارۆدان و تێکچوونی بارودۆخەکان رووبەرووی بوونەتەوە”.
دەشڵێت، “بە پشتبەستن بە بنەما نیشتمانی و مرۆییەکانمان لە باکووری رۆژهەڵاتی سووریا و لەسەر بنەمای درێژکردنەوەی دەستی هاوکاری بۆ هەموو ناوچەیەکی سووریا، کە پێویستی بە پشتیوانیی هەیە ئامادەیی تەواومان بۆ کردنەوەی رێڕەوێکی مرۆیی بەرەو سوەیدا دووپات دەکەینەوە”.
ئیلهام ئەحمەد باسى لەوەشکردووە، داوا لە کۆمەڵگەی نێودەوڵەتی و سەرجەم لایەنە پەیوەندیدارەکان دەکەن رۆڵی ئەخلاقی و فشارەکانیان بۆ ئاسانکاریی ئەم رێڕەوی مرۆییە چربکەنەوە بۆ دڵنیابوون لە گەیاندنی هاوکاریی بۆ خەڵکی شارەکە و دوور لە بەسیاسیکردن یان هەلقۆستنەوەى سەربازی.
