قەندیل پرێس
پەخشی کەناڵی تەلەڤیزیۆنیی زووم راگیرا، ئەوەش دوای ئەوەی کارمەندەکانی کەناڵەکەیان جێهێشت.
نزیک کاژێر 01:00ـی نیوەڕۆی ئەمڕۆ، پەخشی کەناڵی ئاسمانیی زووم، بە میدیای بەرەی گەل دادەنرێت و لەلایەن لاهوور شێخ جەنگییەوە سەرۆکایەتی دەکرێت بە تەواوی وەستا.
پەخشی کەناڵەکە لە رێگەی مانگی دەستکرد و لە کەناڵە نێوخۆییەکانیشەوە راگیراوە.
پێش راگیرانی پەخشەکە، رەحمان غەریب، رێکخەری سەنتەری میترۆ گوتی: “هێزێکی گەورەی ئەمنی بە چەکی سووک و قورسەوە بەسەر کەناڵی ئاسمانیی زوومیان دا داوە”.
رەحمان غەریب گوتی: “لە کەناڵەکە تەنیا پەیامنێرێک هەبووە بە ناوی محەممەد دڵشاد و هێزەکە دەستگیریان کردووە، لە هەوڵداین بۆ ئازادکردنی”.
هێمن مەحموود، بەڕێوەبەری کەناڵی زووم گوتی: “ئاگاداری هێز نین، چونکە پێشوەختە کەناڵەکەمان چۆڵکردووە”.
ئەمە دووەمجارە هێزەکانی یەکێتی هەڵدەکوتنە سەر میدیاکانی لاهوور شێخ جەنگی. لە 08ـی تەمموزی 2021، کاتێک ناکۆکی کەوتە نێوان بافڵ تاڵەبانی و لاهوور شێخ جەنگی، هێزەکانی یەکێتی بارەگای تەلەڤیزیۆنی ئای پڵەسیان کۆنترۆڵکرد، کە ئەوکات لاهوور جەنگی خاوەنداری دەکرد.
