Qendîlprêss
Îlham Ehmed got ku wan ji Sûriyeyê re gotiye ku divê zarokên Kurd bi zimanê dayikê werin perwerdekirin û got ku mafên Kurdan di destûrê de û cihê şervanên jin di tugayan de hatine misogerkirin.
Hevseroka Daîreya Pêwendiyên Derve ya Rêveberiya Xweser Îlham Ehmed di civînek li ser pêşketinên dawî yên li Sûriyeyê de got, “Divê her kes hişyar be ji ber ku hin kes dixwazin dabeşbûnên navxweyî biafirînin, nemaze di nav gelê herêmê de.”
Îlham Ehmedê biryarên hikûmeta Sûriyeyê yên li ser Kurdan erênî bi nav kir, û got ku, lêbelê, wekî berê, hîn jî hewl tê dayîn ku mafên Kurdan werin binpêkirin û ew ji nasnameya xwe werin bêparkirin.
Li ser perwerdeya bi zimanê Kurdî jî Îlham Ehmedê got ku wan ji hikûmeta Sûriyeyê re gotiye ku zarokên Kurd nikarin vegerin perwerdehiya Erebî.
Her wiha Îlham Ehmedê da diyarkirin ku ew ê çend civînan bi Wezareta Perwerdehiyê ya Sûriyeyê re bikin da ku pirsgirêka perwerdehiya bi zimanê Kurdî çareser bikin.
Îlham Ehmed, li ser bicihkirina mafên Kurdan di destûra nû ya Sûriyeyê de axivî û got ku komîteya nivîsandina destûrê hîn nehatiye avakirin, lê komîte dê di pêşerojê de were avakirin.
Derbarê pêşeroja şervanên jin de, Îlham Ehmedê got ku ji bo misogerkirina hebûna şervanên jin, li Hesekê û Kobaniyê lîwayên taybet dê werin avakirin.
