قەندیل پرێس
قەندیل پرێس- راپۆرتی مەیدانی، ئامێدی
هاووڵاتیانی سنووری قەزای ئامێدی چیتر نایانەوێت لەسەر دەرگای بەرپرسان و لایەنە پەیوەندیدارەکان بە “ڕەزیلی و مەلیلی” بوەستن و بڕیاریاندا بە کردەیی کۆتایی بەو چاوەڕوانییە بهێنن کە تەنها بەڵێنی بێکرداری لێ شین دەبوو.
پەیامنێری قەندیل پرێس لە پارێزگای دهۆک ڕاگەیاند: ئەمڕۆ 24ـی شۆباتی 2026 دانیشتووانی زیاتر لە 20 گوندی ئەو سنوورە، بە هەڵوێستێکی مەیدانی و توند، ڕێگای سەرەکی نێوان ئامێدی و دهۆکیان داخست و ڕایانگەیاند کە گرتنی ڕێگاکە تەنها پەیامێکی بێزاری نییە، بەڵکو نیشانەی ئەوەیە کە چیتر بڕوایان بە “وەعد و پەیمانی سەر کاغەز” نەماوە.
بەشێک لە هاووڵاتیانی ناوچەکە بە قەندیل پرێسیان ڕاگەیاندووە کە چەندین جار بە شێوەیەکی “جامیری و مۆدێرن” داوای مافی گەڕانەوەیان کردووە، بەڵام بێ ئەنجام بووە، بۆیە ئێستا ناچارن خۆیان بەربەستەکان لاببەن و ڕێگای گوندەکانیان بکەنەوە. ئەو هاووڵاتیانە ئاماژە بەوە دەدەن کە هەستیان کردووە شکۆ و شەخسییەتیان لەسەر دەرگای بەرپرسان بریندار دەکرێت و کەس ئاوڕ لە داواکارییەکانیان ناداتەوە مەگەر کاتێک شەقامەکان نەگیرێن.
دوای لادانی بەربەستە ئەمنییەکان لەلایەن خۆپیشاندەرانەوە، بەشێک لە هاووڵاتیان توانییان بگەنە ناو گوندەکانی خۆیان، بەڵام بەپێی زانیارییە مەیدانییەکان، دیمەنێکی دڵتەزێن و وێرانییەکی زۆر بە سیمای گوندەکانەوە دیار بووە؛ خانووەکان ڕووخاو و باخەکان سووتاو بوون، بەڵام خەڵکەکە سوورن لەسەر ئەوەی ژیان بۆ ئەو وێرانانە بگێڕنەوە. ئەوان دووپاتی دەکەنەوە کە ئەو زیاتر لە 20 گوندە تەنها ژمارە نین، بەڵکو مێژوو و ژیان و ئەولەهین کە دەبێت بە زووترین کات خزمەتگوزارییان بۆ دابین بکرێت و چیتر وەک ئاوارە لە ناوچەکانی خۆیاندا نەمێننەوە.
ئەم جۆش و خرۆشەی هاووڵاتیان بۆ گەڕانەوە لە کاتێکدایە کە پتر لە ساڵێکە ئارامییەکی گشتگیر باڵی بەسەر ناوچەکەدا کێشاوە و دەنگی چەک و تەقە نەبیستراوە. باگراوەندی ئەم بارودۆخە دەگەڕێتەوە بۆ دەستپێکردنی جۆرێک لە پرۆسەی ئاشتی و لێکتێگەیشتن لەنێوان پەکەکە و تورکیا، کە بووەتە هۆی وەستانی بۆردومان و پێکدادانەکان لە سنووری ئامێدی. سەرەڕای ئەم ئارامییەش، لە ماوەی ڕابردوودا دەسەڵاتدارانی ناوچەکە ڕێگرییان لە گەڕانەوەی ئەو هاووڵاتیانە دەکرد کە لە ساڵانی ڕابردوودا بەهۆی شەڕی نێوان تورکیا و پەکەکە گوندەکانیان چۆڵ کردبوو. خەڵکی ناوچەکانی بەری گاری، نهێلێ، نێروە، ڕێکان و دۆسکی ژۆری، ئێستا ئارامیی ناوچەکە بە دەرفەت دەبینن بۆ ئاوەدانکردنەوەی زێدی باوباپیرانیان، بەڵام وەک هاووڵاتیان باسی دەکەن، گەورەترین بەربەست لەبەردەمیاندا خەمساردیی دەسەڵات بووە نەک بارودۆخی ئەمنی.
