Qendîlprêss
Wezareta Parastinê ya Siûdiyê ragihand ku bi hevkariya Fermandariya Navendî ya Hêzên Amerîkayê (CENTCOM), êrişî baregehên komên çekdar ên li Îraqê kiriye ku ew têne gotin piştgiriya Îranê distînin û di êrişên li ser saziyên petrolê yên Siûdiyê de rolek hebûne.
Berdevkê Wezareta Parastinê ya Siûdiyê, Lîwa Turkî Malikî, got ev êriş bersiva wan êrişên dronan e ku li herêmên Şerqiyê û Riyadê hatibûn kirin. Wî destnîşan kir ku Siûdiye li gorî madeya 51ê ya Peymana Neteweyên Yekbûyî mafê xwe yê parastina ax û berjewendiyên xwe bi kar tîne.
Malikî got armancên ku hatine hedefgirtin bi êrişên li ser qadên petrolê re girêdayî bûn û ev operasyon bi hevahengiya CENTCOMê hatin kirin.
Heşdî Şebî: 8 çekdar hatin kuştin
Heşdî Şebî ragihand ku baregehên wê li çend deverên Îraqê rastî “êrişeke terorîstî” ya ji aliyê Amerîka û Siûdiyê ve hatine kirin. Li gorî daxuyaniyê, di encamê de hinek çekdar hatine kuştin û hinek jî birîndar bûne.
Fermandarê Operasyonên Nînowayê got ku di êrişa li ser baregehên Heşdî Şebî li parêzgeha Nînowayê de 8 çekdar hatine kuştin û 4 kes jî birîndar bûne.
CENTCOM: Depoyên çekan hatin hedefgirtin
CENTCOM ragihand ku balafirên şer ên Amerîka û Siûdiyê li rojhilatê Îraqê pêgehên lojîstîk û depoyên çekan ên komên çekdar ên bi Îranê ve girêdayî kirine hedef.
Li gorî CENTCOMê, ev êriş bersiveke leşkerî bû ji bo zêdetirî 30 êrişên dronan ên ku di 72 saetên borî de li dijî hêzên Amerîkayê û binesaziya enerjiyê ya Siûdiyê hatibûn kirin.
CENTCOM her wiha hişyar kir ku metirsî hîn berdewam e û ji Îranê xwest ku êrişên komên çekdar rawestîne da ku rê li ber bersivên leşkerî yên mezintir negire.
