قەندیل پرێس
ئەمڕۆ، 28ی ئەیلوولی 2025، هاکان فیدان، وەزیری دەرەوەی تورکیا، لە کۆنفرانسێکی رۆژنامەوانیدا لە نیویۆرک رایگەیاند، وڵاتەکەی چاودێریی گفتوگۆکانی نێوان هێزەکانی سووریای دیموکرات (هەسەدە) و حکومەتی دیمەشق دەکات.
“مەترسییەکانی هەسەدە لە رۆژەڤیاندایە”
فیدان جەختی کردەوە کە هەڕەشەکانی هەسەدە و یەپەگە وەک هەمیشە لە رۆژەڤیاندایە و ئامانجی تورکیا بوونی سووریایەکە کە نەبێتە سەرچاوەی هەڕەشە بۆ ئاسایشی نیشتمانیی تورکیا.
وەزیری دەرەوەی تورکیا گوتی: “چاودێریی پرۆسەی گفتوگۆی نێوان هەسەدە و دیمەشق دەکەین. ئامانجی ئێمە بوونی سووریایەکە کە نەبێتە سەرچاوەی هەڕەشە بۆ ئاسایشی نیشتمانیی تورکیا، هاوکات کورد و هیچ لایەنێکی دیکە هەست نەکەن لەژێر مەترسیدان و هەست بە دڵنیایی و یەکسانی بکەن.”
کۆبوونەوەی ئەردۆغان و ترەمپ “بەرهەمدار” بوو
هاکان فیدان کۆبوونەوەکەی رۆژی 25ی ئەیلولی نێوان رەجەب تەیب ئەردۆغان و دۆناڵد ترەمپی بە “بونیادنەر، بەرهەمدار و دۆستانە” ناوبرد و گوتی، هەردوو وڵات ئیرادەی چارەسەرکردنی کێشەکانیان هەیە.
ئەمە لە کاتێکدایە، کە ماوەی پێنج ساڵە بەهۆی کڕینی سیستمی بەرگریی ئێس-400ی رووسی، ئەمریکا سزای بەسەر تورکیادا سەپاندووە. تورکیا هەوڵدەدات سزاکانی “CAATSA” هەڵبگیرێن بۆ ئەوەی بتوانێت بگەڕێتەوە ناو پڕۆژەی فڕۆکەی ئێف-35.
فیدان لەو بارەیەوە گوتی، سزاکەی ئەمریکا “لەگەڵ رۆحی هاوپەیمانێتی و هاوبەشیی ستراتیجیدا ناگونجێت.”
