قەندیل پرێس
لە ئەنجامی تەقەکردنی ڕاستەوخۆی هێزە ئەمنییەکانی ئێران لە بەرزاییە سنوورییەکانی میراوێ، کاسبکارێکی کورد بریندار کرا و بەهۆی سەختیی برینەکەیەوە ڕۆژێک دواتر لە نەخۆشخانە گیانی سپارد.
ڕۆژی ٣٠ـی ئەیلوولی ڕابردوو، هێزە ئەمنییەکانی ئێران لە بەرزایی سنوورەکانی میراوێ ـ کە ناوچەیەکی شاخاوی و سەختە و دانیشتووانەکەی بە ناچاری بۆ بژێویی ژیان ڕووی تێدەکەن ـ دەستڕێژی گولــلەیان لە هاووڵاتییەک بە ناوی خالید شێر کرد، کە خەریکی ئاژەڵداری و کاسبی بوو لەو ناوچەیە.
بەگوێرەی زانیارییەکان، سەرەڕای گواستنەوەی ناوبراو بۆ نەخۆشخانەی شاری ورمێ بە مەبەستی چارەسەر، بەڵام بەهۆی قورسی و سەختیی برینەکەیەوە، ڕۆژێک دواتر کۆچی دوایی کرد.
ناوچە سنوورییەکانی ڕۆژهەڵاتی کوردستان ماوەیەکی زۆرە شاهیدی قوربانیدانی بەردەوامی کاسبکاران، کۆڵبەران و کاسبکارانی کوردن، هۆکاری سەرەکیی پەنابەردنی ئەو هاووڵاتییانەش بۆ ئەو کارە مەترسیدارانەی ناوچە سنوورییەکان، بۆ نەبوونی ژێرخانی ئابووریی گونجاو و بێکاری لە ناوچە کوردییەکاندا دەگەڕێنرێتەوە.
