قەندیل پرێس
وەزارەتی بەرگریی ئەمریکا (پێنتاگۆن) ئەمڕۆ چوارشەممە، بە شێوەیەکی فەرمی کۆتاییهاتنی پرۆسەی “ورەی پۆڵایین” (Inherent Resolve)ی لە عێراق لەلایەن ویلایەتە یەکگرتووەکان و وڵاتانی هاوبەشی لە هاوپەیمانیی نێودەوڵەتی ڕاگەیاند، هاوکات جەختی لە بەردەوامبوونی پاڵپشتییەکانی بۆ هێزەکانی عێراق کردەوە.
لە ڕاگەیەندراوێکی فەرمیدا، پێنتاگۆن ئاماژەی بەوە کردووە کە ئەمریکا و هاوبەشەکانی بە فەرمی کۆتایی بە پرۆسەی “ورەی پۆڵایین” دەهێنن. ڕوونیشی کردووەتەوە کە پرۆسەی کشانەوەی ڕێکخراوی هێزەکان و کەرەستە سەربازییەکانی هاوپەیمانان لە بنکەی ئاسمانیی هەولێر، نوێنەرایەتیی قۆناغی کۆتایی ئەم ئەرکە سەربازییە دەکات.
لە بەشێکی دیکەی ڕاگەیەندراوەکەدا، وەزارەتی بەرگریی ئەمریکا دووپاتی کردووەتەوە کە سەرەڕای کۆتاییهاتنی ئەرکە سەربازییە مەیدانییەکان، واشنتۆن بەردەوام دەبێت لە پێشکەشکردنی ڕاهێنانی تایبەتمەند و پاڵپشتیی هەواڵگری بە هاوبەشە عێراقییەکانی.
لە کۆتاییشدا پێنتاگۆن ڕایگەیاندووە، بۆ قۆناغی داهاتوو چاوەڕوان دەکرێت هێزە ئەمنییەکانی عێراق خۆیان سەرکردایەتیی تەواوی هەوڵەکان بکەن بۆ پاراستنی ئاسایشی وڵاتەکە و کۆنترۆڵکردن و ڕێگریکردن لە سەرهەڵدانەوەی پاشماوەکانی چەکدارانی ڕێکخراوی داعش.
