قەندیل پرێس
دەنگدانی پێشوەختەی پەرلەمانی نەرویج ئەمڕۆ دەستیپێکرد و 18 پارت کێبڕکێ لەسەر 169 کورسی دەکەن، لەنێو بەربژێرەکاندا 7 کورد هەن.
رۆژی 8ی ئەیلوول، رۆژی سەرەکیی هەڵبژاردنەکەیە. لە ئەمڕۆوە دەنگدانی پێشوەختە دەستپێدەکات تاوەکو 5ی ئەیلوول. دەنگدانی پێشوەختە بۆ ئەو کەسانەیە کە بە هۆکاری کار یان بەرنامەیەکی دیکەی تایبەت بە خۆیان، زووتر دەنگ دەدەن، ئەمەش بۆ ئاسانکاریی هاووڵاتییانە.
پەرلەمانی نەرویج 169 کورسیی هەیە و 18 پارتی سیاسی لە 19 پارێزگای ئەو وڵاتە کێبڕکێ لەسەر کورسییەکان دەکەن. هەر پارتەی لە هەر پارێزگایەک دەتوانێ 30 بەربژێری هەبێت.
7 بەربژێری کورد هەن کە بەم شێوەیە دابەشبوون
لە پارتی سوور:
نیگار عینایەتی، پارێزگای ئاکەرشهوس
سەحەر ئایدار، پارێزگای ئۆسلۆ
نەویسا فەلەحزادە، پارێزگای هێدەرمارک
ئەوین ساڵح، پارێزگای تێلەمارک
پارتی سۆسیال چەپ
بەرهەم ئازادی، پارێزگای ئۆستفۆڵد
مانی حوسەینی، پارێزگای ئۆسلۆ
ئەیلوی دەمیرهان، پارێزگای ئۆسلۆ
بەگوێرەی دوایین راپرسی میدیای نەرویج، پارتی کار 29%ی دەنگەکان، پارتی پێشکەوتن کە پارتێکی راستڕۆی پارێزگارە 21%ی دەنگەکان و پارتی پارێزگاران 16%ی دەنگەکان دەبەنەوە. پارتی چەپی سۆسیال 7% و پارتی سوور 6%ی دەنگەکان دەبەنەوە.
هەڵبژاردنی رابردوو، پارتی کار 48 کورسی، پارتی پارێزگاران 36 کورسی و پارتی ناوەند 28 کورسی پەرلەمانیان بردەوە. پارتی چەپی سۆسیالست 13 کورسی و پارتی سور 8 کورسیان بردەوە.
