قەندیل پرێس
فرانسوا هۆلاند سەرۆک کۆماری پێشووی فەرەنسا لە گوتارێکدا لە پاریسی پایتەخت ستایشی قوربانیدان و قارەمانێتیی هێزەکانی کوردی کرد لە تێکشکاندنی ڕێکخراوی تیرۆریستی داعش و ڕایگەیاند کە جیهان بەبێ ڕۆڵی کورد و بەتایبەت ڕۆژئاوای کوردستان نەیدەتوانی ئەو سەرکەوتنە مێژووییە بەدەستبهێنێت.
ئەم وتانەی هۆلاند لە میانی بەشداریکردنی هات لە رێوڕەسمی کردنەوەی مەڵبەندی کوردستان لە فەرەنسا کە بە ئامادەبوونی ژمارەیەکی بەرچاو لە کەسایەتییە دیارەکانی فەرەنسی و کورد بەڕێوەچوو.
هۆلاند لە بەشێکی سەرەکیی وتارەکەیدا گەڕایەوە بۆ قۆناغی سەرۆکایەتییەکەی لە کۆشکی ئێلیزێ و ڕۆڵی هێزە کوردییەکانی لە بەرەکانی پێشەوەی شەڕ بەبیر هێنایەوە و گوتی، بێ کورد سەرکەوتن بەسەر داعش لە سووریا ڕووی نەدەدا و ئەگەر خوێنی کوردانی ڕۆژئاوای کوردستان نەبوایە ئەستەم بوو جیهان بەسەر ئەم ڕێکخراوەدا سەربکەوێت.
سەرۆکی پێشووی فەرەنسا هەروەها باسی لە دیداری مێژوویی خۆی کرد لە کۆشکی ئێلیزێ لەگەڵ ژنە فەرماندە و شەڕڤانانی کورد کە ڕابەرایەتیی ئۆپەراسیۆنە مەیدانییەکانیان لە ڕۆژئاوای کوردستان دەکرد، و جەختی لەوە کردەوە کە پێویستە پاریس هەمیشە لەسەر هێڵی هاوهەڵوێستی و پشتیوانیکردنی کوردان بمێنێتەوە.
لە تەوەرێکی دیکەی وتارەکەیدا هۆلاند ئاماژەی بە پێگەی کۆمەڵگەی کوردی کرد و ڕایگەیاند کە ئێستا 420 هەزار کورد لە فەرەنسا دەژین و دڵی هەموویان بۆ فەرەنسا لێدەدات.
ناوبراو ستایشی بەشداریی بەرفراوانی کوردانی کرد لە بوارە جیاوازەکانی زانست، کولتوور، بازرگانی و بەتایبەت خزمەتگوزارییە مەزنەکانیان لە کەرتەکانی پزیشکی و تەندروستیدا، و ئاماژەی بەوە کرد کە ئەم ئامادەییە دەبێتە هەوێنێک بۆ متمانە بە داهاتوو.
قەندیل پرێس