قەندیل پرێس
شاندی ئیمراڵی وردەکاریی دیدارە چوار کاتژمێرییەکەی دوێنێیان لەگەڵ عەبدوڵا ئۆجەلان بڵاوکردەوە و ئاماژە بەوە دەکەن کە پڕۆسەکە پێویستی بە “یاسای ڕاگوزەری ئاشتیی سەدە” هەیە.
دیدارێکی چوار کاتژمێری و کاریگەرییە ئەرێنییەکان
شاندی ئیمراڵی لە ڕاگەیێنراوێکدا ئاشکرای کرد، دوێنێ بۆ ماوەی چوار کاتژمێر لەگەڵ عەبدوڵا ئۆجەلان کۆبوونەتەوە.
لە دیدارەکەدا گفتوگۆ لەسەر سەردانی لیژنە پەرلەمانییەکە کراوە و جەخت کراوەتەوە کە ئەو سەردانە “کاریگەریی ئەرێنی” هەبووە لەسەر ڕەوتی پڕۆسەکە.
هۆشداری لە هەوڵە تێکدەرەکان و “کودەتا”
لە بەشێکی دیدارەکەدا ئۆجەلان باسی لەو لێدوان و کردارانە کردووە کە دژی پڕۆسەی ئاشتین و ڕایگەیاندووە: “لە هەموو پڕۆسەکاندا کاری تێکدەرانە دووبارە دەبنەوە و ئەمانە هاوشێوەی کودەتان.”
شاندەکە دەڵێت، ئۆجەلان کارە تێکدەرانەکانی پڕۆسەکانی ڕابردووی وەبیر هێناوەتەوە و جەختی لەوە کردووەتەوە کە نابێت ڕێگە بە دووبارەبوونەوەیان بدرێت.
“یاسای ڕاگوزەری ئاشتیی سەدە”
ئۆجەلان نەخشەڕێگای بۆ قۆناغی ئێستا خستووەتەڕوو و ڕایگەیاندووە:
پێویستمان بە ئاشتییەکە کە پشت بە بنەمای گشتگیر ببەستێت.
توندوتیژیی سیاسی و ڕێکاری دەرەوەی دیموکراسی دەبێت لە ڕۆژەڤی تورکیا بچنە دەرەوە.
دەتوانین بەم هەنگاوە بڵێین “یاسای ڕاگوزەری ئاشتیی سەدە”.
بۆ ئەم مەبەستەش، ڕاگەیێنراوەکەی 27ی شوبات ڕێگەنیشاندەرە.
بەشداریکردنی یاسایی کورد
ئۆجەلان پەیامی داوە کە ئەم پڕۆسەیە بریتییە لە “بەشداریکردنی کورد لەڕێگەی یاساییەوە لەناو کۆماری تورکیا” کە پشت بە فراوانترین پێکەوەیی کۆمەڵایەتی دەبەستێت و خواستی پێکەوەژیان نیشان دەدات.
