قەندیل پرێس
رێکخراوی CPTـی ئەمریکی ئامارى هێرشەکانى تورکیای بۆسەر ناوچەکانی هەرێمى کوردستان بۆ مانگى نیسان بڵاوکردەوە و رایگەیاند، لە مانگى نیساندا بەراورد بە مانگى ئازار هێرشەکانى تورکیا 78% زیادیانکردووە.
رێکخراوەکە دەڵێت، هێرشەکانى تورکیا لە زیادبووندایە و بەتەنیا لە مانگى نیساندا 210 جار بۆردوومانى چەند ناوچەیەکی لە هەرێمى کوردستان کردووە، کە بەهۆیانەوە سێ خانووی هاوڵاتییانى سڤیل بەتەواوى خاپووربوون و دوو خانووى دیکەش زیانیان بەرکەوتووە.
بەگوێرەى ئامارى رێکخراوەکە، زۆرترین هێرش و بۆردوومانەکان بۆ سەر پارێزگاى دهۆک ئەنجامدراون، کە دەکاتە نزیکەى 92%ى هێرشەکان، هەروەها 12 هێرش بۆسەر سنوورى پارێزگاى هەولێر ئەنجامدراون، بەڵام لە مانگى نیساندا سوپاى تورکیا هیچ هێرشێکى بۆ سەر سنوورى پارێزگاى سلێمانى و نەینەوا ئەنجامنەداوە.
رێکخراوی CPTـی ئاماژەى بەوەشکردووە، 92%ى هێرشەکانى سوپاى تورکیا بۆ مانگى نیسان لە سنوورى ئامێدى ئەنجامدراون و بەتەنیا لە یەک رۆژدا 53 هێرشى بۆسەر گوند و چیاکانى سنوورەکە ئەنجامداوە، کە زۆرترین هێرش و بۆردوومانە لەمساڵدا تۆمارکرابێت.
بەگوێرەى ئامارەکانىCPTـی لەسەرەتاى ئەمساڵەوە تاوەکو ئێستا لانیکەم 616 هێرشى بۆ سەر هەرێمى کوردستان ئەنجامداوە، کە بەهۆیانەوە سێ کەسى سڤیل گیانیان لەدەستداوە و شەش کەسى دیکەش برینداربوون.
راشیگەیاندووە، پەکەکە لانیکەم پێنج جار هێرشى کردووەتەسەر بارەگاکانى تورکیا لە چیاى مەتینا و دوو هێرشى کردووەتەسەر بنکەیەکى هێزەکانى پێشمەرگە و بەهۆیەوە چوارپێشمەرگە برینداربوون.
