قەندیل پرێس
سپای پاسدارانی ئێران بە بیانووی بەڕێوەبردنی مانۆڕی سەربازی و تۆپباران كردنی بەرزاییەكانی شاھۆ لە ڕوانسەر، ھاتوچۆی ھاووڵاتییانی لە بەشێك لەو ناوچەیە قەدەغە كرد.
دانیشتوویەكی گوندێكی داوێنی شاخی شاھۆ بە تۆڕی مافی مرۆڤی كوردستانی گوتووە: لە چەند ڕۆژی ڕابردوودا سپای پاسداران كاروانێكی كەلوپەل و كەرەستەی قورسی سەربازیی لە دەوروبەری شاھۆ لە ڕوانسەر جێگیر كردووە. لە ڕێگەی ئەنجومەنی گوندەكانەوە بڵاوكراوەتەوە كە ھاتوچۆی ھاووڵاتییان بۆ ناوچە دیاریكراوەكانی شاھۆ بە تەواوی قەدەغەیە و بەرزاییەكانی ئەم شاخە، لەوانەش ناوچەی “پیرخدر” تۆپباران دەكرێن.
بەپێی ئاگادارییەكی ئەنجومەنی گوندی “شوانكارە” لە بەشی شاھۆی شاری ڕوانسەر، قەدەغەی ھاتوچۆ لە بەرزاییەكانی شاھۆ لە گوندی بەدرئاوا تاوەكوو پیرخدر و تەنگەی گڵیچی دەگرێتەوە. پێشتریش سەرەتای خەرمانانی ئەمساڵ، بەھۆی تۆپبارانی سپای پاسداران لە ناوچەكانی سەر بە كامێران، ئاگرێكی بەرفراوان لە شاخی شاھۆ كەوتەوە.
