قەندیل پرێس
بەگوێرەى دواین ئامارى روانگەى سوورى بۆ مافەکانى مرۆڤ، بەهۆى شەڕ و پێکدادانەکانى 36 رۆژى رابردوو لە نزیک بەنداوى تشرین و پردى قەرەقۆزاق 401 کەس گیانیان لەدەستداوە.
روانگەى سوورى بڵاویکردەوە، 36 رۆژە شەڕ و پێکدادانەکانی نزیک بەنداوی تشرین بەردەوامە و تورکیا پاڵپشتی ئاسمانیی گرووپە چەکدارەکان دەکات.
بەگوێرەى ئامارى روانگەى سوورى، 292 چەکدارى گرووپەکانى نزیک لە تورکیا کوژراون، هەروەها 36 هاوڵاتیی سڤیل کە پێنج ژن و دوو منداڵیان تێدایە گیانیان لەدەستداوە، هاوکات 73 کەس لە هێزەکانى سوریاى دیموکرات کوژراون.
لە مانگى رابردوودا بە نێوەندگیری ئەمریکا رێککەوتنی ئاگربەست لە نێوان هێزەکانی سووریای دیموکرات و گرووپەکانى نزیک لە تورکیا راگەیەندرا، بەڵام تورکیا و گرووپەکان پێداگری لەسەر کۆنترۆڵی بەنداوی تشرین دەکەن.
هاوکات هاوڵاتییانى کۆبانێ بۆ پاڵپشتى مرۆیى بەنداوەکە چەند رۆژێکە لەوێ ماونەتەوە و تورکیا بە فڕۆکەى بێفڕۆکەوان بۆردوومانیان دەکات و بەو هۆیەوە پێنج کەس گیانیان لەدەستداوە و نزیکەى 40 کەسى دیکەش برینداربوون .
