قەندیل پرێس
ئەمڕۆ جێگری سەرۆکی ئەنجومەنی سیاسیی حیزبوڵا، مەحمود قوماتی ڕەتیکردەوە کە گرووپەکەی چەکەکانی دابنێت و رایگەیاند: حیزبوڵا چەکەکانی ڕادەست ناکات، چونکە هێزێکە بۆ نیشتیمان و سەروەریی لوبنان.
قوماتی ئەوەشی خستەڕوو کە ئیسرائیل ڕۆژانە هێرش دەکاتە سەر لوبنان و بۆیەش هیچ فشارێکی ئەمریکی و ئەورووپی کاریان تێناکات بۆ ئەوەی دەستبەرداری چەکەکانیان ببن چونکە پارێزەری لوبنانن.
ئەو بەرپرسە ئاماژەی بە بڕیاری نێودەوڵەتیی ۱۷۰۱ دا و وتی کە حیزبوڵا پابەندی بووە، بەڵام ئیسرائیل پابەند نەبووە لە کاتێکدا ئەمریکا و فەرەنسا پشتیوانیان لە ڕێککەوتنەکە کردووە.
بەپێی ڕاپۆرتی ڕۆژنامەی “لوفیگارۆ”ی فەرەنسی لە ئێستادا حیزبوڵا زیاتر لە ژێر زەویدا کار دەکات و بە نهێنییەوە پێکهاتەی سەرکردایەتی و هێزی سەربازیی خۆی دووبارە دروست دەکاتەوە و هەرچەندە بە شێوەی ڕواڵەتی ڕەزامەندی لەسەر دانانی چەکەکانی دەردەبڕێت، بەڵام لە مۆڵگەکانی ژێرزەویدا پێچەوانەی ئەوە دەکات.
لە مانگی ئابی ڕابردوودا، حکومەتی لوبنان بڕیاریدا چەکی حیزبوڵا دابنرێت و سوپا پلانێکی پێنج قۆناغی دانا، بەڵام حیزبوڵا ڕەتیکردەوە.
ئیسرائیل پێداگری لەسەر داماڵینی چەکی حیزبوڵا و دوورخستنەوەی لە سنوورەکانی دەکات، لەگەڵ هەڕەشەی دەستپێکردنی شەڕێکی نوێ لە دژی لوبنان ئەگەر حیزبوڵا چەک دانەماڵێت.
