قەندیل پرێس
لقی ٩ی دادگای باڵای کۆماری ئیسلامی ئێران بەهۆی کەموکوڕیی لێکۆڵینەوە و پابەندنەبوونی یاسا، بڕیاری سێدارەی وەریشە مورادی (زیندانیی سیاسیی کورد) کە پێشتر لەلایەن لقی ١٥ی دادگای شۆڕشی تارانەوە دەرچووبوو، هەڵوەشاندەوە و دۆسیەکەی بۆ لێپێچینەوەی دووبارە گەڕاندەوە بۆ هەمان لق.
مستەفا نیلی، پارێزەری وەریشە مورادی، لە پۆستێکدا لەسەر ئێکس (تویتەر) نووسیویەتی:
«پاش پێداچوونەوەی سکاڵای پێشێلکردنەوە لەسەر خانم وەریشە مورادی لە دادگای باڵا، بەهۆی کەموکوڕیی لێکۆڵینەوە و پابەندنەبوون بە ڕێکارە یاساییەکان (تێنەگەیاندنی تۆمەتی سەرەکی کە بڕیاری سێدارەی لەسەر دامەزراوە لە قۆناغەکانی لێپێچینەوەدا) بڕیارنامەی لقی ١٥ی دادگای شۆڕشی تاران هەڵوەشایەوە و دۆسیەکە بۆ لێپێچینەوەی دووبارە گەڕایەوە بۆ هەمان لق.»
