قەندیل پرێس
دەوڵەت باخچەلی، سەرۆکی گشتیی مەهەپە رایگەیاند: “لە ئایندەیەکی نزیکدا و بۆ هەمیشە دەروازەی سیاسەتی دیموکراتی دەکرێتەوە و پێوێستە پەکەکە بەدەم بانگەوازەکەی ئۆجەلانەوە بچێت”.
دەوڵەت باخچەلی، سەرۆکی گشتیی مەهەپە راگەیەندراوێکی لەبارەی ژمارەیەک پرس، لەنێویاندا چەکدانانی پەکەکە و هەڵبژاردنی پێشوەخت بڵاوکردەوە.
باخچەلی دەڵێت: “لە ئایندەیەکی نزیکدا دەرفەتی ناشتنی چەکەکان و دەروازەی سیاسەتی دیموکراسیی لە ئامێزگر بۆ هەمیشە دەکرێتەوە”.
دەشڵێت: “گونجاوترین بژاردەی عەقڵانی و دادپەروەریی ئەوەیە لەم قۆناغەدا پەکەکە کۆنگرە بکات و لەسەر بنەمای بانگەوازەکەی 27ی شوبات خۆی هەڵبوەشێنێتەوە و چەکەکان رادەستی کۆماری تورکیا بکات”.
سەرۆکی مەهەپە بە پێویستیشی دەزانێت ئەم پرۆسەیە چیتر درێژنەکرێتەوە و دەڵێت، ئەرکی لەپێشینەمانە سەرچاوە نیشتمانییەکان بۆ گەشەپێدانی ئابووری و کۆمەڵایەتی بگۆڕین، چاکسازیی ریشەیی و سەرتاسەریی ئەنجامبدەین و بەرەو جێبەجێکردنی ئامانجی “تورکیای بێ تیرۆر” هەواڵی مژدەبەخش وەربگرین.
لەبارەی دەنگۆکانی ناکۆکیی ناو هاوپەیمانیی جمهور و ئەوەی رەنگە مەهەپە داوای هەڵبژاردنی پێشوەختە بکات، باخچەلی دەڵێت: “ئەو قسانە درۆن و وەک مەهەپە و هاوپەیمانیی جمهور پابەندین بە ئەنجامدانی هەڵبژاردن لە وادەی خۆیدا”.
